حجت الهامی

بوردان بیر آتلی گئچدی
آتین اویناددی کئچدی
گون کیمی شفق سالدی
آی کیمی باتدی کئچدی

دوکتور حمید تقی خانلو ۱۳۲۸گونش ایلی خوی شهرینده آنادان اولموشدور.
ایلک و اوراتا تحصیلاتین همن شهرده باشا چاتدیریب تهران بیلیم‌ یوردوندان مهندس‌لیک و هم دوکتورلوک سویه‌لرده تحصیلاتینی بیتیرمیشدیر .
سونرا اورمونون دامپزشکی اداره‌سینده ناظر اولاراق ایشه باشلاییب ائلجه بو شهرده ساکین اولور.
او ادارده بیر عمر صادقانه چالیشاندان سورا امکچی اولموشدور .
دوهتور بیر سوره‌ده خوی ساللاخاناسی ( کشتارگاه) نین مدیری اولموشدور.
آنجاق هر زامان اؤیرنجى چاغلاری یا ایش آدامی اولاراق یانی‌سیرا بیر مدنی فعال کیمیده چالیشمیشدیر.
گئرچکدن آنا یوردو آذربایجان و تورک ائلینه لایق بیر ائولاد اولوب تورک دیل و ادبیات و فولکولورونون وورغونو اولموشدور.
یازی و دانیشیقدا ادبی تورک دیلینه تسلطی ایچون بیر سورده اداره‌لرینین خالقلا ایلیشکیلر ( روابط عمومی ) دایره‌سینه مسئول سئچیلمیشدیر .
بو چاغلار رادیو _ تلویزیون و مطبوعاتدا ائتگی‌لی چالیشیب و تانینمیشدیر.
دقت چکیجی دانیشیق و یازیلاریندان دولایی ائله بو دوره‌ده من دوکتور تقی‌خانلو ایله عمومی تانیش اولموشدوم.
او هر زمان چالیشاردی حتی تخصصی یازی و پایلاشیملاریدا قایدالی تورکجه اولسون
اما منله داها یاخیندان ، صمیمی و دواملی یولداشلیغیمیز تورک دیل و ادبیات صینفلاریندان باشلادی .
پروفسور داشقین ین اورمودا قوردوغو دیل کیلاسلاریندا بیزله برابر بیر آغ ساققال همیده دیسیپلین‌لی کیشیده ایله‌شیردی
مهندس تقى خانلو چوخ ساوادلی و گؤزل تورکجه دانیشان اولدوغونا رغما کلاسلاردا اشتراک ایچون گنج روحیه‌سی واریدی .
او زامانلار من صاباحیمیز هفته‌لیگینده تورک دیل و ادبیات بؤلومونون باش کاتیبی‌دیم . جناب تقی‌خانلودا او یوخارى ساواد همیده عشق و علاقه‌نى گؤردوکجه ایسته‌دیم بیزیم درگیده امکداشلیق ائتسین اودا کؤنولدن قبول ائدیب بیر ستوندا دواملی مقاله یازیب همیشه جلسه‌لریمیزده شرکت ائدردی.
او زمانلاردان یانی ۲۰ ایلدن آرتیق اولاراق بیزیم درین آنلایش ، یولداشلیق و امکداش‌لیغیمیز هر ساحه‌ده سونونا قدر دواملی اولدو.
رحمتلیک هر زامان مدنی فعالیتلره کؤنوللویدى سئوینج گوروپو ، بابک قالاسی ، کاظم خان داشی ، چئشیدلی فستیوال و تؤرنلرده … حتی اورمودا مجلس و شورای شهرین انتخاباتی فعالیت‌لرینده بیرلیکده قاتیلاردیق.
هردن مستعار “توغای ” آدینی قوللانیردی
او گئرچکدن بیر ضیالی تورک انسانیدی
ایراندا سیاسی ، اجتماعی و فرهنگی سیخینتیلارا دوزه بیلمه‌یب ایشدن امکچی یا بازنشست اولاندان سونرا تورکیه یه کؤچوب اوردا آزاد یاشاماغی آرزی ائدیر.
آنالیادا بیر باغ ائوی آلیب بیر مدت اوردا دینج یاشاییر اما بوردا آنا یوردو و ائولادلاری‌یندان اوزاق قالماغادا دؤزنمه‌یب یئنی‌دن اورمویا چؤنور…
دئیه بیلرم بلکه بعضى نیسگیللری اؤزو ایله تورپاغا آپاردی اما رحمتلیک حاضیرلیقلا بو فانى دونیادان کؤچدو . اؤرگینده بیر نیسگیل داها واریدی کی حتی اؤز ائولادینا توصیه ائده بیلمیردی .
اونا گؤره دونیاسینى دئیشمه‌دن ائله خسته‌خانادا منی چاغیریب دئدی ؛ تقدیرى دئمک اولماز اما اگر اؤلسم ایستیرم ترحیم بیلدیریسینى سن تورکجه یازاسان
حتى اؤزو شعرینى و دتایلارینى منه آنلاتدى…
داها ۲۱ فورال ، ۲ اسفند یا بایرام آیی دونیالیق آنا دیلی گونو منه عؤمور بویو نیسگیللی بیر گون اولاجاق
هم آنا دیلیمیزین رسمی اولمادیغینا گؤره هر ایل آجی چکیریک دئولتمیزده تورک دیلینه اوگئی کیمی یاناشیب و داها دوغروسو بو دیلین یتیم کیمى قالماسى
همیده بوگون آنا دیلینه وورغون اولان ایکى سایغى دّیّرلى انسانین آیریلیق ماهنسى
بیرى بویوک شاعر رحمتلیک دده کاتیب کی الیمدکی مصاحبه‌سی فوت ائلیندن سونرا گون اوزو گؤردو
بیریده دّیّرلى یازار و ژورنالیست دوکتور تقى‌خانلو.
او منه هم یاخین یولداش ، سیرداش و هم معنوی آتا کیمیدی.
١٣٩٩ بایرام آیى نین ٢ سى بئین کیریزى عارضه‌سی اثرینده حقه قووشدو.
روحلاری شاد و یوللاری دواملی اولسون

پنبه داغ جنون ایچره نهاندیر بدنیم
دیری اولدوقجا لباسیم بودور اؤلسم کفنیم
جانی جانان دیلمیش وئرممک اولماز ای دل
نه نزاع ائیلیه لیم ، کیم نه سنیندیر نه منیم
ائدمن ترک فضولی سر کویون یارین
وطنیم‌دیر وطنیم‌دیر وطنیم‌دیر وطنیم