عاصم ادربیلی جنابلارین یازدیغی جواب سخنور جنابلارین مکتوبونا

من که چوخداندی کارام سن نئجه سن

لالینان هم قاطارام سن نئجه سن

قییشقیران چوخسا ائشیتمیر قولاغیم

سدّ اولور یازماغیما آسقیراغیم

قلمیم ایسته میر اولسون چوماغیم

هله لیک بئیله وارام سن نئجه سن

من که چوخداندی کارام سن نئجه سن

کور دا اولسام دوزه لر جمله ایشیم

بو کشاکشده کیمیلن گیریشیم

کوته لیپدیر داها آغزیمدا دیشیم

اتیلن یوخدی آرام سن نئجه سن

من که چوخداندی کارام سن نئجه سن

نئیله مک آج قولاغیم دیژ قولاغیم

قوی هله کورپونو آشسین اولاغیم

خابینا آشسا اگر سوز بولاغیم

صاحب مال داوارام سن نئجه سن

من که چوخداندی کارام سن نئجه سن

یئری اولسا دره یه داغ دئییرم

گونده اون یول اؤلی یه ساغ دئییرم

گر ائشیتسون قارایا آغ دئییرم

بونو بیل یوخدو چارام سن نئجه سن

من که چوخداندی کارام سن نئجه سن

اوزومو مدّت اولار ازدیریرم

یوخسولا قاش گؤزومو سوزدورورم

قارا گوندوز لره ال گزدیررم

ساغالیر کهنه یارام سن نئجه سن

من که چوخداندی کارام سن نئجه سن

لوت رعیّت نه بیلیر قیمتیمی

کیمدیر او آرتیرا شخصیتیمی

چونکی اربابدی توتان حورمتیمی

دئسه آج یات، یاتارام سن نئجه سن

من که چوخداندی کارام سن نئجه سن

منی هر کس قیناییر قوی قیناسین

آلارام مین دؤنه ارباب قاداسین

یئری وار گونده اؤپم آستاناسین

عاشق شام ناهارام سن نئجه سن

من که چوخداندی کارام سن نئجه سن

داها بوندان بئله دوستوم نه قمیم

شاخدا گوج گلسه اگر یانسا زمیم

یا دنیزلرده ایتیپ باتسا گمیم

رای آلیپ رای ساتارام سن نئجه سن

من که چوخداندی کارام سن نئجه سن

ائلیمین یوردی تالانمیش منه نه

آتش فقرده یانمیش منه نه

“عاصمین” صبری جالانمیش منه نه

چون که قانسیز دامارام سن نئجه سن

من که چوخداندی کارام سن نئجه سن